रेशमाच्या रेघानी

टोप्याच टोप्या सर्वांना

2012-01-19T21:18:00.000-08:00

सुट्टीमधे केलेले काही पराक्रम तुम्ही इथे पाहिलेच आहेत. ते सगळे संपल्यावरही अजुन थोडी सुट्टी शिल्लक होती. काय करावे असा विचारच चालला होता तोवर मला सर्क्युलर सुयांवर टोपी करायला शिकायचे आहे हे लक्षात आले. पारांपारीक पद्धतीने २ सुयांवर टोपी विणली तर ती शिवावी लागते. तशी केलेली टोपी इथे पहायला मिळेल. ३-४-५ दोन टोकी सुया वापरूनही टोप्या करतात. याप्रकारे केलेल्या टोप्या शिवाव्या लागत नाहीत पण सर्व सुयांवरचे टाके सुटून जाणार नाहीत यांची काळजी घेणे, व्यवस्थीत टाके वाढवणे, तो पसारा नीट जागेवर ठेवणे हे करणे म्हणजे माझ्यासाठी महाकठीण काम होते/आहे. या कारणासाठी म्हणून मग मी सर्क्युलर सुयांवरची टोपी शिकायचीच असे ठरवले होते. देसीनिटरला यासंदर्भा॑त मी मागे विचारणा केलेली होती तेव्हा तिने युट्युबवर खुप माहिती सापडेल आणि तुला नक्की जमेल असा धीर दिला होता. तिने नुकताच एक विणकामाबद्दलचा मराठी ब्लॉग चालू केलाय. तो पहायला विसरू नका!

तिने दिलेल्या धिराच्या जोरावर मी एकेदिवशी संध्याकाळी, जुनी लोकर, माझ्याकडे असलेली कोणत्यातरी नंबरची गोल सुई असा सगळा पसारा घेऊन एका कोपच्यात जाऊन बसले. समोर युट्युबवरची ही लिंक चालू होती. साधारण ३-४ वेळा पुढे-मागे करुन पाहीली. मग सुईवर साधारण ७० टाके घातले आणि देवाचे नाम स्मरून टाक्यांना पीळ पडलेला नाही हे ३-४ वेळा तपासले आणि सगळे टाके एकत्र करून त्याचा नीट गोल बनवला. आणि विणायला सुरुवात केले. आणि काय मज्जा! एका फटक्यात टोपीची सुरुवात झाली. मग ६-७ इंच विणकाम वाढल्यावर त्यावर मार्कर टाकून ७ भाग बनवले. आणि टाके कमी करायला सुरुवात केली. साधारण २० एक टाके राहिले तेव्हा विणायला त्रास व्हायला लागला. म्हणुन मग २ टोकांच्या सुयांवर सगळे टाके नीट हलवले. मग अगदी शेवटी ७ टाके राहिले तेव्हा मग साधारण ६-७ इंच लोकर ठेवून मग तोडून टाकली. ती लोकर बिनटोकाच्या (टेपस्ट्री नीडल) सुईत ओवून मग उरलेल्या टाक्यांमधून २-३ वेळा ओवली. नीट गाठ मारली. आणि उरलेला धागा तोडून टाकला.

तयार झालेली टोपी फारच मोठी आणि जाळीदार झाली आहे कारण मी बारीक लोकर आणि मोठी सुई वापरली होती. मग लगोलग जाऊन जाड लोकर, त्याला लागणारी गोल सुई, त्याच नंबरच्या दोन टोकाच्या सुया असे सगळे सामान आणले. ती टोपी केली.

गेल्या १५ दिवसात एकूण ५ टोप्या केल्या आहेत :) घरी सर्वांच्या डोक्यावर मी केलेली टोपी असावी (म्हणजेच मी सर्वांना टोप्या घातल्या असे सगळ्यांना म्हणता येईल) अशा विचाराने मी अजुनही टोप्या करतच आहे :)

कचर्‍यातून कला अर्थात Up-Cycling

2011-12-25T18:39:00.000-08:00

सुट्टीचा सदुपयोग आणि घरातील साठवलेले सामान काढून टाकणे या कारणाने केलेला हा एक उद्योग.

मलमलच्या ओढणीपासून केलेल्या भाजी ठेवायच्या पिशव्या -
माझ्याकडे एक मलमलची मस्त ओढणी होती. काही ना काही कारणाने ती कधी वापरलीच नाही. ती तशीच जपून ठेवलेली काहीतरी करू म्हणुन. तीन चार महीन्यापूर्वी मला अशीच एक पिशवी सामानात मिळाली आहे. त्यावर भाज्या ठेवण्यासाठी पुनर्वापर करा असे लिहीलेले आहे. त्यात कोथिंबीर ठेवली तर अजिबात खराब होत नाही. सुकत जाते पण कुजत नाही हे लक्षात आले. म्हणून मग अजुन तशा पिशव्या करायच्या असे ठरवले.
साधारण २०" बाय १४ इंच असे तुकडे कापून घेतले. माझ्या ओढणीत असे १२ तुकडे झाले. नेहेमीसारखी पिशवी शिवली पण तिला बंद (हँडल) नाही केले. त्याऐवजी वरच्या पट्टीतून लोकर नाडी म्हणून वापरली. मस्तपैकी १२ पिशव्या झाल्या. आता त्यातल्या काही मला, काही मैत्रिणींना देणार!

कुर्त्यांच्या बाह्यांपासून कोस्टर्स -
भारतात अलीकडे कुर्ते विकत घेतले की स्लिव्हलेस येतात आणि सोबर त्याच्या बाह्या दिलेल्या असतात. तशा काही बाह्या मी न वापरता साठवून ठेवल्या होत्या. कित्येक दिवस त्या कपाटात पडून होत्या. त्यांचा वापर करून मी कप ठेवण्यासाठी कोस्टर्स केले. साधारण ४"बाय ४" मापाचे तुकडे कापले. माझ्याकडे इतर शिवणाच्या प्रोजेक्टसाठी आणलेले पांढरे आणि काळे कापड होते. त्याचे पण त्याच मापाचे तुकडे अस्तर म्हणून कापले. अस्तर आणि मूळ कापड असे उलट शिवून मग उलटले. कडेने परत शिवले. प्रत्येक २ बाह्यांमधे मिळून ४ कोस्टर्स झाले. कडेने मणी, वरून थोडे धावदोरे टाकून ते सजवले.

पॉट होल्डर्स आणि टेबल रनर -
कोणत्यातरी कारणासाठी मी साधारण १/२ मीटर कापड विकत आणले होते. त्याचा वापर झालाच नव्हता. म्हणून मग त्याचा वापर करून टेबर रनर (१०" बाय ४०") आणि काही पॉट होल्डर्स (८" बाय ८") केले. त्यात आतमधे मी क्विल्टींगचे बॅटींग (कापसाचा पातळ थर) वापरला आहे.

स्नो फ्लेक्स

2011-12-16T23:28:00.000-08:00

ख्रिसमसमध्ये एक मैत्रिण अगदी हौसेने झाड आणते आणि ते सजवते. यावर्षी तिला क्रोशाचे दोन स्नोफ्लेक्स करून पाठवले. त्याचे हे फोटो -

खालील नमुना कुठे पाहून केला आहे तो मी विसरले आहे. थोडी शोधाशोध करून इथे देईन.

खालील नमुना इथे पाहून केला आहे - http://yellowpinkandsparkly.blogspot.com/2009/12/snowflake-earrings.html

शुभ दिपावली

2010-11-04T22:54:00.000-07:00

तुम्हा सर्वांना ही दिवाळी सुखाची, समॄद्धीची जावो. या दिवाळी निमित्ताने तुमच्याकडून एखाद्या कलेची जोपासना होवो ही सदिच्छा.

मी 'हितगुज दिवाळी अंक' या मायबोलीच्या दिवाळी अंकात कर्नाटकी कशिद्यासंदर्भात एक लेख लिहीला आहे. तो इथे पहायला मिळेल -

http://vishesh.maayboli.com/node/877

तुम्हाला लेख कसा वाटला, चित्रफीत कशी वाटली हे जरूर कळवा.

टोपी

2009-12-25T22:33:00.000-08:00

Hat Ready

अलिकडे एका मैत्रिणीला तिच्या वाढदिवसाला काय द्यावे असा विचार चालला होता. अगदी ड्रेस, पुस्तक, मिक्सर, स्वेटर इत्यादी प्रकार शोधुन पाहिले. पण एकही गोष्ट मनासारखी वाटेना. एकाचा रंग आवडला तर दुसर्‍याचा पॅटर्न असे काहिसे होऊन सगळे बाद ठरवण्यात आले. असाच शोध चालु असताना मला एक मैत्रिण भेटली जी स्वेटर वगैरे खुप करते. एकावेळी ३- प्रोजेक्ट तरी हातात असतातच. तिच्या सल्ल्याने आणि आग्रहाने मी एक टोपी करायला घेतली. रॅव्हलरी नावाची एक साईट आहे तिथे माझी नाव नोंदणी केली. नुपुरच्या ब्लॉगमुळे आणि देसीनिटरच्या ब्लॉगमुळे तिथे माझी नाव नोंदणी केली आणि एक मस्त सोपा पॅटर्न मिळवला.

In the Works

सुरुवात केली आणि लक्षात आले की घेतलेला पॅटर्न, सुया आणि लोकर खुपच किचकट आहे.परत येरे माझ्या मागल्या करत शोधमोहिम सुरु केली. यावेळी मात्र लोकर साधी अ‍ॅक्रिलिक प्रकारची घेतली कारण तिला धुणे, वापरणे वगैरे सोपे जाईल म्हणुन. पॅटर्न पण लगेच मिळाला. सुरुवात केल्यावर लगेचच जाणवले की हे पटकन होणार आहे. तसेच झाले ११ इंच उंचीची टोपी अवघ्या दीड दिवसात पूर्ण केली. या टोपीची वीण अगदी सोपी आहे. जाड लोकरीमुळे खुलुन दिसते.

Hat on Head

मी खालील पॅटर्न जसाच्या तसा वापरला -

http://www.knitlist.com/95gift/simphat.htm

(Above pattern is gone so adding another link where you can find this pattern - http://www.wikihow.com/Knit-the-Mistake-Rib-Pattern)

कांथावर्कबद्दल थोडेसे

2009-11-11T21:59:00.001-08:00

Motif on a dress

या वर्षात मी बरेच उद्योग हातात घेतले आणि पूर्ण देखिल केले. भारतभेटीत कोणी केलेल्या साड्या, ड्रेसेस वगैरे पाहिले आणि लगेच हात सुर्सुरायला लागले. साडी भरुन पूर होणे शक्य नव्हते म्हणुन मग टॉप, ड्रेस वगैरे भरायचे ठरवले साहित्याची जुळवाजुळव केली आणि करायला घेतले. भारतवारीमधे त्यातले ९०% काम पूर्ण केले आणि उरलेले इथे आल्यावर लगेचच. त्यातले बरेच कांथावर्क आहे. हा एक प्रकार माझ्या अतिशय आवडीचा. मोठे मोठे डिझाईन भरता येते. वेगवेगळ्या टाक्यांचा कल्पक वापर करता येतो.
kantha dress

आज थोडे कांथावर्कबद्दल - हे काम बंगालभागात बरेच केले जाते. प्लेन सिल्कची साडी आणि त्यावर उठावदार रंगाने भरलेले डिझाईन सुंदर असते. पूर्ण डिझाईन बारिक धावदोर्‍याने भरले जाते. अगदी पाने, फुले, पाकळ्या, असले तरी पूर्ण भरगच्च धावदोर्‍याने भरले जाते. वेगवेगळे रंग किंवा एकाच रंगाने हे काम करतात. शाईसारख्या निळ्या रंगाच्या साडीवर अथवा ड्रेसवर ऑफव्हाईट रंगाने केलेले काम अप्रतीम दिसते तसेचगर्द हिरव्या रंगावर पिवळ्या, गुलाबी, तपकिरी, काळ्या रंगाचे काम सुंदर दिसते.

Kantha Saree

नविन सुरुवात करायची असेल तर काश्मिरी टाक्यासाठी लागणारे कोणातेही डिझाईन कांथासाठी वापरु शकता. धावदोरा अगदी बारिक घालायचा, लहान पाकळ्या, गोल असतील तर सॅटीन वापरायचा. एका रंगात किंवा वेगवेगळे रंग वापरुन डिझाईन पूर्ण करायचे.

डिनर नॅपकिन्स

2008-07-27T22:09:00.000-07:00

एका मैत्रीणीला काहीतरी गिफ्ट द्यावे असे खुप मनात होते पण काय द्यावे ते सुचत नव्हते. त्यच दरम्यान तिच्याकडे डिनरला गेले असताना प्लेन डिनर नॅपकिन्स पाहीले. तिला जरा घाबरतच विचारले की भरत्काम करून देऊ का? साधे सोपे काहीतरी करायचे होते अचानक मासे भरावेत असे वाटले लगेच डिझाईन करून चापून ठेवले. साधारण २ तासात पूर्ण सेट तयार झाला. त्यातल्या दोन नॅपकिन्सचा हा फोटो

Dinner Napkins

एका नॅपकिनचा थोडा डिटेल फोटो -

Close look at the fishes!

हे पण संपूर्ण डिझाईन कांथावर्कनेच केले आहे.

कांथावर्क

2008-07-27T21:28:00.000-07:00

ब-याच दिवसांपासून हा फोटो इथे टाकायचा म्हणून ठरवला होता आज वेळ मिळाला. साधा प्लेन शर्ट मिळाला विकत त्यावर काहीतरी कारागीरी करायची हुक्की आली. कांथावर्क केले कारण सोपे आणि उठावदार दिसते म्हणून. शर्टच्या बाह्या रँगलन प्रकारच्या असल्याने डिझाईन छापणे आणि भरणे सोपे गेले. पिवळ्या रंगाच्या कार्बनने डिझाईन केले. डेनिम ब्लु रंगाने कांथावर्कने विणले. साधरण ४५ मिनीटात 'कस्ट्म शर्ट' तयार!

Kantha Work

क्षमस्व

2008-03-20T22:34:00.000-07:00

सध्या मला ऑफीसमधील काम आणि इतर कारणांमुळे नमुने करुन फोटो काढुन इथे ते नीट लिहिणे शक्य होत नाही. मला लिहायचे म्हणुन लिहिणे आणि थातुर-मातुर काहीतरी लोकांसमोर ठेवणे आवडत नसल्याने हा उपक्रम थोडे दिवस थांबवला आहे. जेव्हा जमेल तेव्हा लिहुन ठेवते आहेच पण सगळे नीट जमुन पोस्ट करायाला थोडा वेळ जाईल असे वाटतेय.
साधारण एप्रील महिन्याच्या सुरुवातीला हा ब्लॉग परत वेग घेईल असा माझा अंदाज आहे. तोपर्यंत तुम्ही धीर धराल अशी अपेक्षा आहे. तुम्हाला काही शंका/अडचणी असतील तर नक्की लिहा, मदत करायचा प्रयत्न जरूर करेन.

तुमच्या सर्वांच्या प्रोत्साहनाबद्दल अनेक धन्यवाद.

गाठीचा टाका

2008-01-23T22:44:00.000-08:00

गाठीचा टाका

गाठीचा टाका घालण्यासाठी काही गोष्टी लक्शात ठेवणॅ जरूरीचे आहे. गाठीच्या टाक्याला मोठे मोठे डिझाईन असावे. हा टाका शक्यतो पडद्यासाठी, बेडकव्हर वगैरेसाठी वापरावा. कापड शक्यतो कॉटनचे आणि सुई जाड असावी. भरतकामासाठी शक्यतो ४ ते ६ पदरी रेशीम वापरावे.

डिझाईनसाठी एक रेघ काढुन घ्या. जाड सुईमध्ये ६ पदरी रेशीम ओवुन घ्या. रेघ उभी दिसेल अशाप्रकारे रिंग समोर धरा. आता रेघेच्या खालच्या टोकाला सुई कापडातून वर काढा. साधारन ३-४ मिलीमीटर अंतरावर सुई रेघेवर कापडात खाली घाला आणि साधरण २ मिलीमीटर अंतरावर रेघेच्या डाव्याबाजुला कापडातुन पूर्ण वर काढा. आता सुई आत्ता आपण घातलेल्या धाग्याच्या खालुन पण कापडात आत न घालता उजवीकडुन डावीकडे घालायची आहे. यामुळे आधीच्या टाक्यावर एक फुली घातल्याप्रमाणे दिसेल. आता या फुलीच्या वरच्या भागात पहीला जो टाका टाकला होता त्याखालुन पुन्हा सुई घाला पण कापडात टोचु नका. त्या सुईखाली मुख्य धाग्याने गहु टाक्याला घालतो त्यापद्धतीने वेढा घाला. सुई हलक्या हाताने पूर्ण वर काढा. असेच डिझाईन पूर्ण करा.

Knot -1

Knot - 2

Knot - 3

Knot - 4

Knot - 5

Knot - 6

Knot Design

उपयोग - मोठी मोठी फुले, पाने (साधारण ८-१० इंच व्यास असलेली) या टाक्याने आउटलाईनने भरतात. नाजुन कामासाठी हा टाका उपयोगी नसतो. परंतु नाजुन फुले थोडे कष्ट घेऊन ३ पदरी धाग्याने भरली तरी चांगले दिसु शकते. लहान मुलांच्या दुपट्यांवर वगैरे ३ पदरी धाग्याने कार्टून कॅरॅक्टर्स ह्या टाक्याने भरलेली मी पाहीलेली आहेत.

साडी, ड्रेस, टेबक्लॉथ सारखे मोठे काम करताना --

2008-01-21T10:30:00.000-08:00

मधे ब्लॉगवर एका मुलीने मला विचारले की मला साडीवर भरतकाम करायचे आहे कोणते डिझाईन घेऊ, कोणते टाके घेऊ असे विचारले. बरेच दिवस विचार केला यावर आणि या पोस्टप्रपंचावर येऊन गाडी थांबली आहे. आपण खुपदा साड्या, ड्रेसेस वगैरे भरत काम केलेले पहातो आणि आपणही तसेच करावे अशी इच्छा होते. पण काय करावे कसे करावे हे सुचत नाही कधी कधी समजतही नाही. त्यासाठी मला आलेले अनुभव त्यातुन शिकलेल्या काही गोष्टी मुद्दाम नमुद कराव्या वाटल्या त्या सांगायचा एक प्रयत्न. यामधे कोणालाही दुखवण्याचा हेतू नाही. प्रामाणीकपणे मनात आलेय ते सांगतेय. या सगळ्यातून मी स्वतः नेहेमी जाते, त्रास होतो तेव्हा हे मला पण तितकेच लागू आहे.

एखाद्याने साडीवर भरतकाम केले म्हणुन मला करायचेय या पेक्षा मला ते काम जमेल का? माझ्याकडे तेवढा पेशन्स आहे का? तेवढा वेळ द्यायची तयारी आहे का? हा विचार प्रथम करावा. मुख्य महणजे आपण हातात घेतलेले काम पूर्ण करतो का? ह्याचा स्वतःशीच विचार करावा. खुपदा भावनेच्या भरात किंवा मैत्रीणीने केले म्हणुन वगैरे आपण काहीतरी करायला घेतो आणि त्यात खुप इंटरेस्ट नसेल तर दुर्लक्ष केले जाते आणि काम पूर्ण होत नाही. त्यात कपडा, कष्ट, दोरे, वगैरे वाया जातात. तेव्हा काम सुरु करण्यापूर्वी आधी थोडा वेळ घालवून आपण काम पूर्ण करु शकु का याचा पडताळा घेणे बरे. बरेचदा ऑफीसच्या कामात अडकून जाऊन या कामाला हत लावणे शक्य होत नाही तेव्हा होणारी चिडचीड वगैरे आपण सहन करु शकू का हाही विचार करावा. याहुनही महत्वाचे, या कामातला इंटरेस्ट काम शेवटाला नेईपर्यंत टिकुन राहील का याचा विचार काम हातात घेण्यापूर्वी करावा.

तुम्ही पुणे, मुंबई वगैरे सारख्या मोठ्या शहरात रहात असाल तर रेशीमवगैरे विकणा-या दुकानात साड्या छापून देतात का याची चौकशी करावी. बरेचदा ते दुकानदार हे काम करतात. त्यांच्याकडे बरेचदा डिझाईनची पुस्तके, नमुने असतात त्यातुन डिझाईन निवडणे सोपे असते. त्याआधी तुम्हाला कोणाते टाके वापरून काम करायचे आहे ते ठरवावे लागेल. आणि हे तुम्हाला बाकी कोणी सांगण्यापेक्षा तुमच्या आवडीनुसार, सोईनुसार ठरवावे लागेल. उदाहरणार्थ, तुम्हाला कोणी म्हणाले की ' Long and Short' ने गुलाबाची फुले का नाही करत?' सांगणारा सांगुन जातो पण त्यात कष्ट किती आहेत? ते घेण्याची तुमची तयारी आहे का? तुम्हाला तो टाका येतो का? साडीवर भरण्याइतका सुबक येतो का? हा विचार तुम्हाला स्वतःलाच करावा लागेल. डिझाईन ठरवण्याआधी मनाशी ठरवून ठेवावे की कोणाते टाके वापरायचे आहेत. यापुढची पायरी म्हणजे साडीवर डिझाईन कुठे चापायचे आहे? फक्त पदरावर? की काठ आणि पदर? की फक्त बुट्टे आणि पदर? हा अवाका पण तुमहाला स्वतःलाच ठरवावा लागेल. हे सगळे दुकानात जाण्यापुर्वी मनाशी ठरवावे लागेल. त्यानुसार दुकानदाराला डिझाईन दाखवायला सांगावे. डिझाईन पहाताना तुम्ही मनाशी ठरवलेले अडाखे सतत घोळत असावेत. कारण जसे जसे आपण डिझाईन पहात जातो तसे तसे आपण मनाशी ठरवलेले कुठेतरी विसरले जाते आणि काहीतरी वेगळेच होते! डिझाईन एकदा ठरवले की त्यांना छापायला सांगावे आपल्याला नक्की कोठे हवे आहे ते त्यांना २-३ वेळा सांगुन पक्के समजलेय ना? याची खात्री करावी.

छापून झालेले आणताना रेशीम, सुया, नवीन रिंग लागणार असेल तर, हे सगळे साहित्य आणावे. मला बरेचवेळा विचारलेला गेलेला अजुन एक प्रश्न म्हणाजे रेशमाचे रंग कसे निवडायचे? याला पण 'one size fits all!' इतके सोपे उत्तर नाही. बरेचदा मी स्वतः एखादी आवडलेली साडी असेल तर त्याचे color combination कसे आहे याची मनाशी नोंद ठेवते. उदाहरणार्थ नेव्ही ब्लू कापडावर पांधरा, ऑफव्हाईट, बेबी ब्लु, बेबी पिंक, हे रंग चांगले दिसतात. ऑफव्हाईट रंगावर बरेचसे रंग चांगले दिसतात. रेशीम विकत घेताना लडी एकमेकीशेजारी ठेवून पहावे म्हणाजे म्हणजे combination कसे दिसेल याची थोडीफार कल्पना येईल. रेशीम किती लागेल याचा अंदाज असणे जरूरीचे आहे. त्यासाठी दुकानदारही कदाचीत मदत करु शकेल. आधी केलेल्या कामात किती रेशीम लागले होते ते आठवून त्याप्रमाणे रेशमाची खरेदी करवी. साडी, बेडशीट वगैरेसाठी रेशीम घेताना प्रत्येक रंगाच्या १-२ लडी जास्त घेऊन ठेवाव्यात.

सुई निवडताना पातळ कपड्यासाठी नाजुक सुई निवडावी. सुया घेताना शक्यतो लांब नेढ्याच्या, टोकदार बघुन घ्याव्यात. बोथट सुयांमुळे कापडाचे धागे निघु शकतात. त्याचप्रमाणे बेडशीट वगैरे भरण्यासाठी शक्यतो थोड्या जाड टोकदार सुया घ्याव्यात. सुई लांबीने खुप लहान असु नये. अगदी लहान सुई फक्त कसुती/कर्नाटकी कशीद्यासाठी उपयोगी पडते. तसेच अगदी मोठी जाड सुई शक्यतो गाठीचा टाका जाड कॉटनच्या कापडासाठी उपयोगी पडते. मध्यम उंचीची म्हणजे साधारण १.५ ते २ इंच उंचीची लांब नेढ्याची सुई ब-याच कामासाठी उपयोगाची होते. कांथावर्क साठी थोडी लांबीला जास्त(२" ते २.५") अशी सुई निवडली तर एकावेळी अनेक टाके घालणे शक्य होते. साडी, बेडशीट साठी जर २-३ रंग वापरणार असाल तर प्रत्येक रंगासाठी एक सूई ठेवली तर धागे बदलण्याचा त्रास वाचु शकतो. तसेच सुया बदलताना त्यातले रेशीम कुठेतरी पडुन हरवणे, आणि असे बरेचवेळा झाल्यामुळे रेशीम कमी पडणे या गोष्टी टाळल्या जातात. सुया नीट ठेवण्यासाठी एखादा कापडाचा तुकडा, एखादा लहान रुमाल कामाबरोबर ठेवावा. आणि सुया त्यालाच टोचुन ठेवण्याची सवय पहिल्यापासुन लावुन घ्यावी.

कामाचे कापड, सर्व रेशीम, सुया, लहान कात्री, रिंग वगैरे सगळे एका पिशवीमधे घालुन ठेवावे.काम करायला बसताना हात स्वच्छ धुवुन, स्वच्छ जागेत बसावे कारण कापड धुळीने खराब होऊन डाग वगैरे पडु शकतात.

परदेशात रहात असाल तर डिझाईन निवडणे, छापणे यागोष्टी खुप सोईस्कर नसतात. ब-याचवेळा आपले डिझाईन स्वतः बनवणे, स्वतः छापणे वगैरे करावे लागते. त्यासाठी तेवढा पेशन्स असणे गरजेचे आहे :) डिझाईन कापडावर कोठे छापायचे ती मापे टाकणे, त्या खुणा करुन घेणे. तेवढे कार्बन मिळवणे हे सर्व आपले आपणच करावे लागते. ४० इंचचे डिझाईन असेल तर १०" करुन १ चार वेळा छापायचे का ४०" छाप तयार करुन छापायचे हे 'निर्णय' देखील आपले आपणच करावे लागतात.

या पोस्टमधुन तुम्हाला हवी असलेली माहीती मिळाली का? की अजुन काही हवी आहे ते कळवा त्यानुसार माहीती देण्याचा प्रयत्न करेन.

काश्मिरी टाका

2008-01-09T09:25:00.000-08:00

काश्मिरी टाका

डिझाईनसाठी मध्यम आणि लांबट आकराच्या पाना-फुलाचे डिझाईन काढुन घ्या. पाकळी तुमच्या समोर उभी येईल (परागकणाकडील भाग तुमच्या बाजुला) अशी रिंग धरा. आता सुई पाकळीच्या डाव्या रेघेवर मुळापासुन साधारण २ मिलीमीटर अंतरावर कापडातून वर काढा. तीच सुई पाकळीच्या मुळात खाली घालावी आणि उजव्या पाकळीच्या रेघेवर साधारण २-३ मिलीमीटर अंतरावर वर काढा (इथे एक तिरकस टाका पाकळीत दिसेल). आता सुई पहील्यांदा जीथे कापडातून वर काढली होती त्याच्या पॉईंटच्या खाली परत खाली घाला आणि त्या टाक्याच्या वर कापडातून वर काढा. पुढचा टाका घालताना उजव्या बाजुच्या आधीच्या २ टाक्याच्या मधोमध खाली घालुन दुस-या टाक्याच्यावर कापडातुन वर काढावी. असे करत पाकळी पूर्ण करावी. असेच पूर्ण फूल भरावे.
KashmirI - Design

Kashmiri - 1

Kashmiri - 2

Kashmiri - 3

Kashmiri - 4

Kashmiri - 5

Kashmiri - Petal

उपयोग - लांबट आकाराच्या फुलाच्या पाकळ्या, लांबट पाने, फुलाच्या मधले लंबगोल ह्या टाक्याने भरता येतात.

हेरिंगबोन स्टीच

2008-01-04T21:00:00.000-08:00

हेरिंगबोन स्टीच

सिंगल हेरिंगबोन स्टिच -
डिझाईनसाठी एकमेकीना समांतर रेघा काढुन घ्या. आता त्या रेघा तुमच्यासमोर आडव्या असतील अशी रिंग धरा. आता सुई वरच्या रेघेच्या डाव्या टोकाला वर काढा. आता सुई खालच्या रेघेवर डावीकडुन साधारण १/२ सेंटीमीटर अंतर सोडुन कापडात खाली घालावी पण पूर्णपणे खाली न घालता अगदी किंचीत अंतर (२-३ मिलीमीटर) सोडुन डावीकडे कापडातुन रेघेवर काढावी. आता सुई वरच्या रेघेवर डवीकडुन उजवीकडे साधारण पहिल्या टाक्याच्या १/२ सेंटीमीटर अंतरवर काढावी. असे करत डिझाईन पूर्ण करावे.

उपयोग - बॉर्डरसाठी हा टाका वापरता येतो. हा टाका लखनवी चिकन वर्क (Shadow Work) साठी वापरला जातो. ते कसे हे आपण नंतर पाहू.

Herringbone 1-1

Herringbone 1-2

Herringbone 1-3

Herringbone 1-4

डबल हेरिंगबोन स्टिच प्रकार १ -

डिझाईनसाठी एकमेकीना समांतर अशा २ रेघा काढायच्या आहेत. सिंगल हेरिंगबोन स्टिच प्रमाणे एका रंगाने पूर्ण डिझाईन भरुन घ्यावी. आता एखाद्या दुस-या रंगाने पहिल्या टाक्यांच्या मधे परत हेरिंगबोन टाका घालायचा आहे. सुई पहिल्या रंगाने टाका सुरु करताना जिथे वर काढली होती त्याच्या थोड्या डाव्या बाजुला कापडातून वर काढायची आहे. आधीच्या टाक्यांमधील अंतरात पुढच्या रंगाने हेरिंबबोन टाके घालत डिझाईन पूर्ण करायचे आहे. पहिल्या टाक्यांच्यावेळी दोन टाक्यांमधले अंतर जितके जास्त असेल त्याप्रमाणे २ किंवा ३ रंगाने हेरिंगबोन घालु शकता.

Herringbone 2-1

Herringbone 2-2

Herringbone 2-3

डबल हेरिंगबोन स्टिच प्रकार २ -

डिझाईनसाठी एकमेकीना समांतर अशा २ रेघा काढायच्या आहेत. सिंगल हेरिंगबोन स्टिचघालुन डिझाईन पूर्ण करुन घ्यावे पण २ टाक्यातले अंतर साधरण एक सेंटीमीटर इतके ठेवावे. आत दुस-या रंगाने सुरुवात करताना खालच्या रेघेवर सुरुवात करुन दुसरा टाका आधिच्या ओळीच्या दोन टाक्यांच्या मधोमध घालायचा आहे. असे करत डिझाईन पूर्ण करायचे आहे.

Herringbone 3-1

Herringbone 3-2

Herringbone 3-3

Herringbone 3-4

Herringbone Stitches

बॉर्डरसाठी काही टाके

2008-01-03T20:30:00.000-08:00

बॉर्डरसाठी काही टाके

बॉर्डरसाठी काही वेगळे टाके देतेय. यामधे कोणतेही बदल तुमच्या आवडीनुसार करु शकता.

१. प्रकार १-
डिझाईनसाठी एक साधी रेघ काढुन घ्यावी. त्यावर साधा धावदोरा पण नाजुक असेल असा घालुन घ्यावा. आता दुस-या रंगाने त्या धाग्यातुन एकदा डावीकडुन एकदा उजवीकडुन असा दोरा फिरवावा. पण हे सगळे वरच्यावर करायचे आहे. कापडात सुयी खाली घालायची नाही.
Boder 1-1

Border 1-2

Border 1-3

Border 1-4

Border 1-5

Border 1-6

२. प्रकार २-
डिझाईन म्हणुन समांतर अशा २ रेघा काढुन घ्याव्यात. त्या दोन्ही रेघांवर धावदोरा घालावा. दुसर्या रेघेवर धावदोरा घालताना टाके शक्यतोवर पहिल्या टाक्यांना समांतर येतील असे घालावेत. आता वेगळ्या रंगाच्या दो-याने एका रेघेच्या एका धाग्यातुन सुई दुस-या रेघेकडे जाईल अशी घालावी आणि दुसर्या रेघेचा पहिल टाका तसाच सोडुन पुढच्या टाक्याच्या खाली सुई घालुन बाहेर काढावी. आता परत पहिल्या रेघेचा एक टाका सोडुन पुढच्या टाक्याखालुन सुई काढावी. असे करत पुर्ण नाग्मोड करुन घ्यावी. आता सोडलेल्या टाक्यांमधुन अशीच नागमोड करुन घ्यावी.

Border 2-1

Border 2-2

Border 2-3

Border 2-4

नविन वर्ष कलेच्या आनंदाचे भरभराटीचे जावो!

2007-12-31T20:56:00.000-08:00

Happy New Year 2008!
नविन वर्ष म्हणजे नविन संकल्प करण्याचे दिवस. तुम्हीपण काही संकल्प केले असतील किंवा संकल्प करायचेच नाहीत असे संकल्प केले असतील. जे काही असेल ते असेल! माझ्यातर्फे तुम्हाला नविन वर्षाच्या हार्दिक शुभेच्छा. ह्या नव्या वर्षातले तुमचे सर्व संकल्प पुरे होवोत ही त्या विधात्याजवळ प्रार्थना. नविन वर्षात तुमच्या सर्व कलांना बहर येवो.

फ्रेंच नॉट

2007-12-29T21:27:00.000-08:00

डिझाईन म्हणुन साधे ठिपके काढायचे आहेत जसे की स्ट्रॉबेरीवरील ठिपके किंवा फुलातले परागकण. सुई एका ठिपक्यावर वर काढावी. परत त्याच ठिकाणी खाली घालावी आणि किंचीत अंतरावर (कापडाचे २ धागे इतकेच अंतर असावे) वर काढावी. सुई पूर्णपणे वर न काढता तशीच कापडात ठेवावी. मुख्य धाग्याने, म्हणजे जो धागा कापडातुन पूर्णपणे वर काढलेला आहे त्या धाग्याने सुईभोवती ४ ते ५ वेळा गुंडाळावेत. हे गुंडाळे घालताना खुप सैल नकोत. अता डाव्या हाताच्या आंगठ्याने हा गुंडाळलेला दोरा एकत्र दाबुन ठेवावा आणि सुई पूर्णपणे कापडातुन वर काढावी. डाव्या अंगठ्याने ते पिळे नीट एकेठिकाणी आहेत ना ते बघुन घ्यावे आणि नसतील तर नीट एकत्र करुन घ्यावेत. आता सुई परत कापडात खाली पूर्णपणे घालावी. हा झाला एक टाका. असे लागतील तितके ठिपके घालावेत.

French Knot 1

French Knot 2

French Knot 3

French Knot 4

French Knots

उपयोग - वर सांगीतल्याप्रमाणे, स्टॉबेरीवरचे ठिपके, फुलांमधले परागकण, माणसांचे व प्राण्यांचे डोळे यासाठी हा टाका मुख्यत्वेकरुन वापरला जातो.

फेदर स्टिच

2007-12-26T10:32:00.000-08:00

एकेरी फेदर स्टिच

डिझाईनसाठी एक रेघ काढुन घ्या. आता रेघेच्या एका टोकाकडे सुई कापडातुन वर काढा. आता सुई रेघेच्या उजवीकडे आणि मूळ सुईपासुन थोडी वरच्या बाजुला कापडात घालुन सुईचे टोक रेघेवर काढा आणि दोरा सुईखाली राहील असा ठेवुन सुई ओढा. आता पुढचा टाका रेघेच्या डाव्या बाजुला आणि आधीच्या टाक्याच्यावर थोडी वर कापडात खाली घालुन रेघेवर काढावी आणि दोरा सुईखाली ठेवावा. असे एक टाका उजवीकडे एक टाका डावीकडे असे करत रेघ पूर्ण करावी.

Feather Stitch 1

Feather Stitch 2

Feather Stitch 3

उपयोग - हा टाका डेकोरेटीव्ह स्टीच म्हणुन उपयोग करु शकता. तसेच नाजुक घातला तर लहान लहान पानांसाठी पण वापरता येतो. खालील फोटोमध्ये पाने कशी करावीत ते दिले आहे.

Feather Stitch Leaf

Feather Stitch Leaves
दुहेरी फेदर स्टीच

हा टाका वरील प्रमाणेच घालायचा आहे फक्त एक बदल आहे तो म्हणजे उजवीकडे एका शेजारी २ आणि डावीकडे एकाशेजारी २ असे टाके घालत डिझाईन पूर्ण करायचे आहे.

Double Feather Stitch 1

Double Feather Stitch 2

Feather Stitch side by Side
उपयोग - ह्या टाक्याचा उपयोग पण डेकोरेटीव्ह स्टीच म्हणुन केला जातो. तसेच नाजुक जरा उन्च गवत वगैरे दाखवण्यासाठी केला जातो.

प्रोजेक्ट १ - टेबल मॅट

2007-12-25T10:47:00.000-08:00

टेबल मॅट्स करायला अतिशय सोप्या असतात. बाहेर त्यासाठी अवाजवी किम्मत देण्याऐवजी घरातल्या घरात करुन पहायला हरकत नाही. तुमच्या गरजेप्रमाणे २,४ किंवा ६ चा सेट करु शकता. खाली दिलेले साहित्य ४ टेबलमॅटसाठी आहे. आपल्या गरजेप्रमाणे साहित्य कमी जास्त करावे लागेल.

साहित्य -
३६ पन्न्याचे १ मीटर कॉटनचे आपल्या आवडत्या रंगाचे कापड
डिझाईन शक्यतो लहान साधारण २" लांबी-रुंदीचे
कार्बन पेपर
डिझाईनच्या गरजेप्रमाणे रेशीम

एका तयार टेबलमॅटचे माप १३"x१८" चारही बाजुने दुमडण्यासाठी साधारण १/२" कापड जास्त घ्यावे. शिवण्याआधीचे माप १४"x१९" होईल. कापडावर याप्रमाणे मापे टाकुन टेबलमॅट आखुन घ्याव्यात. आता प्रत्येक मॅटच्या एका कोप~यात डिझाईन छापायचे आहे. त्यासाठी कडेपासुन २-२" जागा कडेने सोडुन त्याच्या आतील बाजुला डिझाईन छापायचे आहे. सोयीसाठी आकृती खाली देत आहे.

Table Mats Layout
टेबल मॅट

बटनहोल टाका

2007-12-24T21:50:00.000-08:00

प्रकार-१

कापडावर एक खालीलप्रमाणे पान आणि फूल काढुन घ्या. आता प्रथम फूल भरायला घेउयात. बाहेरील रेघेवर एके ठिकाणी सुई कापडातुन वर काढा. आता फुलाच्या आतील बाजुला आणि सुईपासुन साधारण थोडे पुढे आणि रेघेच्या थोडे खाली अशी सुई कापडात घाला आणि ती फुलाच्या रेघेवर वरती काढा. हलक्या हाताने दोरा ओढा. दोरा जास्त ताणला गेला तर टाका नीट दिसत नाही आणि खुप सैल सोडला तर टाका खाली उतरतो.
Design

ButtonHole - 1

ButtonHole - 1 Continue

उपयोग - हा टाका घालण्यासाठी थोडा सराव हवा. मेपलच्या पानांच्या प्रमाणे असणा~या पानांसाठी हा टाका चांगला दिसतो. त्याच प्रमाणे मोठ्या दुरेघी पाकळ्या (खालील चित्र पहा), वर डिझाईन मधे दाखवल्यासारखी फुले, नाजुक परड्या विणण्यासाठी होतो.
ह्या टाक्याचा मुख्य उपयोग पॅचवर्कच्या कडा मुख्य कापडाला शिवण्यासाठी होतो. कसे ते आपण पुढे जेव्हा पॅचवर्क शिकु तेव्हा देईनच.

प्रकार - 2
ह्यासाठी वरील डिझाईनच्या फुलामधला गोल वापरायचा आहे. सुई गोलाच्या रेघेवर वर काढा. आता गोलाचा साधरण मध्य शोधुन तिथुन खाली घाला आणि प्रत रेघेवर आधीच्या टाक्याच्या शेजारी थोडे अंतर ठेवुन खली घाला अता पुढचा टाका वर घेताना गोलाच्या मध्यात जिथे सुई खाली घातली होती त्याचठिकाणी खाली घाला. असे करत पूर्ण गोल भरुन घ्या.
ButtonHole - 2

ButtonHole -2 Continue

उपयोग -ह्या टाक्याचा उपयोग मोठ्या फुलांचे गोलाकार मध्यभाग भरण्यासाठी आणि चेरीसारखी फळे भरण्यासाठी होतो.

गहूटाका, साखळी वगैरे

2007-12-20T14:00:00.000-08:00

गहुटाका -
गहुटाक्यासाठी कापडावर खालील प्रमाणे डिझाइन काढा. आता फुलाच्या पाकळिच्या आतील टोकावर सुई कापडातुन वर काढा. आता परत सुई जिथून वर काढली तिथेच खाली तोचा पण पूर्ण्पणे खाली घालू नका. त्याच पाकळीच्या बाहेरील टोकातून सुई कापडातुन वर काढून दोरयाने सुईखालुन वेढा घ्या आणि सुई पूर्ण्पणे कापडाबाहेर काढा. पण दोरा ओढुन ना घेता थोडा सैल ठेवून टाका गव्हासारखा टपोरा दिसेल असा सैल ठेवा. आणि सुई त्या वेढ्यापलिकडे कापडात पूर्णपणे कापडातुन खाली घाला आणि अशाच प्रकारे सगळे फूल पूर्ण करा.
Design1

Stitch1

Stitch2

Complete Flower

साखळी -
कापडावर एक सरळ रेघ डिझाइन म्हणून काढून घ्या. त्या रेघेच्या एका टोकातून सुई वर कढा आणि पहिला टाका गहुटाक्याप्रमाणे घालून घ्या. साखळीची दुसरीकडी म्हणजे पण एक गहुटाकच असतो पण शेवटी सुई कापडातुन खाली घालतो त्याऐवजी पुढचा गहुटाका घालत डिझाइन पूर्ण करायचे आहे आणि सगळ्यात शेवटी सुई कापडातुन खाली घालून गाठ घालायची आहे.

chain 1
chain 2

डबल साखळी -
कापडावर एक रेघ डिझाइन म्हणून काढून घ्या. साखळीचा पहिला टाका घालून घ्या. पुढचा टाका आता ह्या पहिल्या टाक्याच्या शेजारीच घालावायाचा आहे. त्यासाठी सुई परत पहिल्यMदा जिथे वर काढली होती त्याशेजारीच परत खाली तोचा आणि पहिल्या साखळीच्या शेजारी परत कापडातुन बाहेर काढा. आता परत सुईभोवती दोरयाचा वेढा घ्या. दोन गहुटाके शेजारी काढल्याप्रमाणे दिसेल. आता पुढचा टाका ह्या दुसर्या कडीच्या डोक्यावर घालून त्याशेजारचा पहलिया साखळीच्या डोक्यावर घालत घालत डिझाइन पूर्ण करायचे आहे.
Double Chain 1

Double Chain 2

नागमोडी साखळी -
यासाठी एक सरळ रेघ डिझाइन म्हणून काढून घ्या. आता साखळीचा पहिला टाका घालताना डिझाईन्च्या रेघेवार सुई वर ना काढता थोडी त्या रेघेच्या डाव्या बाजूला काढावी आणि नेहेमीप्रमाणे साखळिची कडी पूर्ण करावी. दुसरी कडी घालताना सुई रेघेच्या उजवीकडे काढून पूर्वीप्रमाणेच कडी पूर्ण करावी. असेच एकदा डाविकडे एकदा उजवीकडे करत नागमोडी साखळी पूर्ण करावी.

Zig Zag Chain

उलटी टीप (Stem Stitch)

2007-12-17T21:08:00.000-08:00

कापडावर पेन्सीलने एक सरळ रेघ काढुन घ्या. आधी सांगितल्याप्रमाणे ही रेघ रिंगच्या मधोमध येईल अशी रिंग लावुन घ्या. सुईमध्ये २ पदरी रेशीम ओवुन घ्या. आता डिझाईनच्या एका टोकाला कापडातुन सुई वर काढा. सुई जिथुन वर काढली आहे त्याच्यापुढे साधारन ३-४ मिलिमीटर अंतरावर रेघेवर सुई कापडामधे खाली टोचा. सुई पूर्ण खाली न घालता ती कापडातुन मागच्या बाजुला खालील फोटो मधे दाखवल्याप्रमाणे वर काढा. पुढचा टाका असाच घालत पुढे जावा व राहीलेले डिझाईन पूर्ण करा.

उपयोग -
या टाक्याचा उपयोग फुला-पानांचे देठ, डिझाईनच्या आउटलाईन्स करण्यासाठी होतो.

Variation -

एका रंगाने उलटी टीप घालुन त्यावर दुसर्‍या रंगाने त्या घातलेल्या टाक्यांवर वरच्यावर पीळ घालणे.

इथे पहा : http://www.embroiderersguild.com/stitch/stitches/stem.html

अजुन थोडे नमन ...

2007-12-16T19:17:00.000-08:00

कापडावर डिझाईन छापणे -
कापडाला सुरकुत्या पडल्या असतील तर थोडी इस्री फिरवुन घ्यावी. डिझाईन कोठे छापायचे ते कापडावर मोजुन घ्यावे आणि त्याप्रमाणे पेन्सीलने खुणा करुन, आवश्यक असेल तर हलक्या हाताने रेघा मारुन घ्याव्यात. हे कापण एका टेबलवर किंवा फरशीवर नीट अंथरावे. त्यापूर्वी टेवल/फरशी स्वच्छ करुन घ्यावी अन्यथा कापडाला डाग पडु शकतात. आता डिझाईनचा कागद कापडावर ठेवुन तो कागद नीट ठेवुन कडेने गरज असेल टाचणी लावुन घ्यावी. कार्बनपेपरची एक बाजु साध्या कागदासारखी असते आणि दुसरी बाजु मऊ असते ह्या बाजुला हात लावला तर रंग हाताला लागतो. ही रंग लागणारी बाजु कापडावर येईल यापद्धतीने कार्बनपेपर डिझाईनच्या कागदाखाली ठेवावा. डिझाईन नीट हलक्या हाताने नीट जागी आहे ना ते पाहुन गरज असेल तर टाचण्यानी टाचुन घ्यावे. आणि पेन्सीलने नीट डिझाईनवर परत एकदा डिझाईन काढावे यामुळे ते डिझाईन कापडावर उमटेल. डिझाईन काढल्यावर साधारण ४-५ तास नीट वाळु द्यावे ज्यामुळे कार्बन भरतकाम करताना पसरत नाही. कार्बनचा रंग जरी दोरर्‍याला लागला तरी तो कपडा धुतल्यावर जातो म्हणुन घाबरण्याचे कारण नाही. काळ्या/निळ्या रंगाच्या कापडावर पांधरा/पिवळा कार्बनपेपर वापरावा. पांढर्‍या कापडावर पिवळा/ गुलाबी रंगाचा कार्बन वापरावा. निळा/काळा कार्बन आकाशी, राखाडी रंगाचे कार्बन पेपर वापरावेत.

कापडाला रिंग लावणे -
लहान रिंगचा आतला आणि बाहेरचा भाग वेगवेगळा करावा आणि आतला भाग कापडाच्या खाली आणि डिझाईन साधारण मधोमध येईल असा ठेवावा. आता रिंगचा बाहेरचा भाग थोडा सैल करुन (स्क्रु वापरुन) तो कापडावरुन आतल्या भागावर घट्ट बसवावा. आणि कापड बाहेरच्या बाजुला ताणुन त्याच्या सुरकुत्या काढुन घ्याव्यात. हे रिंग लावलेले कापड साधारण डफलीसारखे दिसते. आतले कापड व्यवस्थीत ताणालेले असावे म्हणजे केलेले भरतकाम सुबक दिसते. कापडाचा आणि दोर्‍याचा ताण नीट एकसारखा असेल तर रिंग काढल्यावर कापड आणि भरतकाम लोळागोळा न होता तसेच रहाते.

रेशीम लडीतुन सोडवुन वापरणे -
कापड साधे सुती असेल तर साधारण ६ पदरी दोर्‍यातले २ पदर वापरावेत. डिझाईन मोठे आणि बटबटीत असेल तर ४-६ पदरी वापरावेत. काही मध्यम आकाराच्या डिझईनना ३ पदरी रेशीम वापरता येते. पडदे, साड्या, बेडशीट, ड्रेस वगैरेसाठी रेशीम जास्त लागते अशावेळी लागणारे सर्व रेशीम एकदम आणुन ठेवावे कारण कंपनीने एखादा रंग discontinue केला तर काय करावे हा प्रश्न पडत नाही आणि एकेक लड संपल्यावर दुकानच्या फेर्‍या मारत बसावे लागत नाही. वापरत असणार्‍या सर्व रेशमांचे रंगांचे नंबर एका कागदावर टिपुन ठेवावेत म्हणजे एखदेवेळी लडीला लावलेले नंबर हरवले तर गडबड होत नाही.

लड करताना रेशमाचे एक टोक ओढले तर सहजी लडीतुन सोडवले जाईल असे ठेवलेले असते. ते टोक हलक्या हाताने लडीतुन ओढावे साधारण २ वेढे ओढले की पुरेश्या लांबीचे रेशीम लडीतुन सोडवले जाते. आता ते रेशीम लडीबरोबर कापुन घ्यावे. कापलेल्या रेशमाच्या तुकड्यातले २ पदर नीट सोडवुन घ्यावेत. आणि उरलेले ४ पदर नीट जपुन ठेवावेत. सोडवलेले २ पदर सुईमधे ओवुन २ पदरीच ठेवावेत. दोन्ही टोके एकमेकांना न जोडता एक रेशमाचे एक टोक सुटे ठेवुन दुसर्‍या टोकाला गाठ घालुन घ्यावी.

सुरुवात करण्यापुर्वी ...

2007-12-16T09:08:00.001-08:00

भरतकाम शिकण्यास सुरुवात करण्यापुर्वी खालील साहीत्य असेल तर शिकण्यामधे सहजता येईल. सामान नसल्यामुळे अडुन रहाणार नाही.
१. अर्धा ते एक मीटर पांढरे किंवा ऑफव्हाईट रंगाचे सुती कापड. या कापडावर तुम्ही सगळे नमुने शिकुन ठेवु शकता आणि त्यावर पेनने नावे लिहुन ठेवलीत तर पुढे पहाण्यासाठी उपयोगी पडते.
२. १-२ काळ्या साध्या पेन्सील्स. शक्यतो मेकॅनिकल पेन्सील वापरु नयेत
३. १-२ ट्रेसिंग पेपर शीट किंवा १-२ कागदाच्या मापाचे तुकडे, ३-४ साधे प्रिंटीग पेपरसारखे पेपर्स.
४. काळा, निळा, पिवळा, लाल रंगाचे कार्बन पेपर - हे मी भारतातुन येताना आणते. US मधे मला मायकेल्समधे पांढरा आणि काळ्या रंगाचे कार्बन ग्राफाईट पेपर म्हणुन मिळाले पण बाकिच्या रंगाचे नाही.
५. लाल, हिरवा, पोपटी, पिवळा, काळा, निळा, चॉकलेटी, गुलाबी अशा तुम्हाला आवडणर्‍या रंगांच्या रेशमाच्या लड्या. शिकण्यासाठी शक्यतो ६ पदरी रेशीम वापरावे कारण ते सुती असल्याने लवकर तुटत नाही आणि गुंता, गाठी होण्याचे प्रमाण कमी. भारतात शक्यतो Anchor चे रेशीम वापरावे. भारताबाहेर DCM चे रेशीम मिळते ते वापरावे.
६. २-३ प्रकारच्या भरतकामाच्या सुया. या घेताना शक्यतो लांब नेढयाच्या घ्याव्यात. १ लहान नाजुक, एखादी मध्यम आणि एखादी जाड असेल अशा बघुन घ्याव्यात. सुया टोचुन ठेवण्यासाठी एखादा कापडाचा तुकडा, छोटा हातरुमाल असे काहीतरी ठेवावे.
७. १ बारीक टोकाची कात्री आणि शक्य असेल तर एखादी वाकड्या टोकाची कात्री
८. तुमच्याकडे असणारी, तुम्हाला आवडणारी काही डिझाईन्स.
९. एक ३-४ इंच व्यासाची रिंग आणि एखादी मध्यम म्हणजे ७-८ इंच व्यासाची रिंग (हया शक्यतो लाकडाच्या घ्याव्यात. प्लास्टीक रिंगमधुन सुळसुळीत कापड सटकते आणि पत्र्याच्या रिंग्स गंजु शकतात.) ह्याना embroidery frame असे म्हणातात.
१०. एखादा प्लास्टीकचा डबा ज्यात तुम्ही हे सगळे सामान नीट ठेवु शकता आणि एखादी प्लास्टीकची पिशवी ज्यात छाप, कार्बनपेपर्स नीट ठेवता येतात. एखादी जुनी फाईलही यासाठी वापरता येते.
११. कापडावर डिझाईन छापताना शक्यतो टेबल, फरशीवर ठेवुन छापावे. कार्पेट, सतरंजी असल्या पृष्ठ्भागावर ठेवुन छापले तर छाप न कापडावर न उमटण्याची शक्यता असते.

महत्वाची सुचना - मी टाक्यांसाठी वापरलेली नावे तुमच्यासाठी कदचीत अपरिचीत असतील किंवा मी लिहिलेली नावे कदाचीत चुकीची असली तर मला तसे कळवले तर मला देखील माझ्या चुका सुधारता येतील. त्याचप्रमाणे मी गरजलागेल तशी काही पुस्तकांची मदत घेण्याची शक्यता आहे त्याचप्रमाणे मी काही आकृत्या एखाद्या वेबसाईवरुन घेईन पण त्याप्रमाणे तशी तळटीप पण देईनच.

मला वाटते एवढे तेल नमनासाठी पुरे झाले आता मुख्य नाटकाला पुढच्या पोस्टपासुन सुरुवात करु :)

|| श्री गणेशाय नम: ||

2007-12-14T11:59:00.000-08:00

कोणत्याही शुभकार्याची सुरूवात गणेशाला वंदन करून करावी असा संकेत आहे. माझ्या नवीन ब्लाॅगची सुरूवात त्याला नमन करूनच.